العطر الملفوف
قصائد نبطية
قصائد نبطية
وش قيمتك يا عطر بالكيس ملفوف
مثل الذهب بالقـاع ما فيه قيمه
إلا على عنق الذي عينـه سيوف
وإلا على زول ٍ مشت فيه غيمه
معروف لو يمشي مع الغيـد معروف
غيـم ٍ و َمَّـرتْ من حـواليه ديمة
ظبي تَرَثَّـع في مفاليه مكشوف
حذر ٍ وعينه تمسح الروض شيمة
خشف ٍ وتمشي مـن حـوالينه خشوف
يمشي يهمز القـاع لطف وحشيمة
يا قلوبنا ياللي على عزمها رهـوف
مـا بَدَّلت عـاداتها اللي قديمه
نعبس بوجه الذيب بكفوفنـا حتـوف
ونخجل مروة بالطبوع الكريمة
عز ومراجل ما بها طبوعنا خلـوف
وعلومنـا فيها الكرامـة غنيمـة
رش العطر وإقطف من أرياحه قطوف
أنت الخزامي والنفـل وأنت ريمه
وأنت الحلا .. كل الذي كان موصوف
واللي يجي عقبك ترى مـا نسيمه
وإرثع بروضك ما لنـا صوبكم شـوف
ستر العذاري واجباته عظيمه
حنا الضحايا لي عرض منـك صادوف
وأنت العزيز اللي نكب في غريمه